Gallerí Fold efnir til aðventulistahátíðar nú um helgina þar sem þrjár sýningar verða opnaðar. Í Baksal gallerísins verður opnuð sölusýning á verkum Þorvaldar Skúlasonar en þau koma öll úr einkaeigu og hafa ekki áður komið fyrir sjónir almennings.
Lítil sýning á hestamyndum Halldórs Péturssonar sem er fólki vel kunnur fyrir myndskreytingar sínar, meðal annars í bókinni Helgi skoðar heiminn, verður opnuð.
Í Hliðarsal gallerísins er árleg jólasýning á verkum samtímalistamanna. Að þessu sinni eru verkin ríflega sjötíu hengd upp í Salon stíl.
Guðbjörn Guðbjörnsson óperusöngvari syngur jólalög við undirleik Guðbjargar Sigurjónsdóttur kl. 15 báða dagana og strengjahljómsveit stúlkna úr Garðabæ leikur létt jólalög kl. 14 og 16.
Á milli kl. 14 og 15 á laugardag mun Daði Guðbjörnsson árita nýju listaverkabókina sína sem gefin var út í tilefni sýningar hans á Kjarvalsstöðum sem nú stendur yfir. Á sunnudag á milli kl. 14 og 15 mun svo Gunnella árita bækur sínar.
Starfsfólk gallerísins kynnir einstök gjafabréf gallerísins sem unnin hafa verið í samvinnu við listamennina Daða Guðbjörnsson og Sigurjón Jóhannsson en þeir hafa gert sérstök listaverk sem fylgja gjafabréfunum.
Þá verður börnum boðið upp á kakó og meðlæti.