Erró - Guðmundur Guðmundsson (1932)

Guðmundur Guðmundsson, betur þekktur sem Erró er fæddur 19.júlí árið 1932. Hann var uppalinn á Kirkjubæjarklaustri en hóf nám í Handíða- og myndlistarskóla Reykjavíkur árið 1949, þar sem hann útskrifaðist af teiknikennaradeild árið 1952. Þá var ferðinni heitið til Osló í listaskólann Statens Kunstakademi þar sem hann nam í tvö ár. Eftir það fór Erró til Flórens í Academia di Belle Arti og síðar í mosaik nám í Ravenna árin 1955-1958.

Erró er tvímælalaust þekktasti samtímalistamaður Íslendinga. Hann hefur verið þátttakandi í framsæknu listalífi Parísarborgar allt frá árinu 1958, þar sem hann settist að,  bæði innan súrrealistahreyfingarinnar og einnig sem einn af forvígismönnum popplistarinnar eða evrópska frásagnarmálverksins. Haustið 2010 var Erró sæmdur æðsta heiðursmerki Frakklands, Riddaraorðu frönsku heiðursfylkingarinnar fyrir framlag til franskra lista og menningar.
Erró byggir verk sín á tilvísunum í myndir annarra sem hann klippir saman og flytur yfir á léreftið. Hann segir frá með myndmáli ofurraunsæis og teiknimynda og frásögn hans er ýmist einföld og kyrrstæð eða flókin og yfirgengileg.
Hann klippir og sundurgreinir, límir og endurbyggir flóknar sögur þar sem viðfangsefnin eru ýmist pólitík, erótík, listasagan, ævisögur, skáldsagnapersónur, teiknimyndahetjur og vísindaskáldskapur eða eigin listaverk.

Errósafn
Árið 1989 gaf Erró Reykjavíkurborg stórt safn verka sinna, um 2000 talsins. Meðal þessara verka er að finna málverk, vatnslitamyndir, grafíkverk, skúlptúra, klippimyndir og önnur listaverk, sem spanna allan feril listamannsins, allt frá barnæsku. Auk listaverkanna gaf Erró borginni umfangsmikið safn einkabréfa, póstkorta, ljósmynda, skyggnumynda, kvikmynda, bóka, veggspjalda, sýningarskráa og blaðaúrklippa sem snerta listferil hans. Þessar ríkulegu heimildir hafa mikið gildi fyrir allar rannsóknir er snerta listamanninn Erró og samtíma hans.